Farmakopeja Evropiane është një mekanizëm i Këshillit të Evropës, me seli në Strazburg, që përcakton standardet e cilësisë dhe të kontrollit për sektorin farmaceutik. Vendet që aderojnë në konventën e saj angazhohen për t’i zbatuar këto standarde në prodhimin dhe kontrollin e barnave.
Për vite me radhë Shqipëria gëzonte vetëm statusin e vëzhguesit në këtë organizëm, pa përfaqësim të rregullt në aktivitetet e tij — i vetmi vend i hapësirës evropiane jashtë konventës, një neglizhencë institucionale që zgjati 24 vjet.
Hapat e parë konkretë u hodhën në vitin 2016, kur pas rrjetëzimit me misionin diplomatik shqiptar në Strazburg, një delegacion nga Shqipëria u ftua në mbledhjen e radhës të Farmakopesë — një përfaqësim i munguar prej shumë vitesh nga institucionet shqiptare. Vizitat e delegatëve u shpeshtuan, por fillimisht pa një rezultat konkret.
Çështja mori vëmendje publike gjatë viteve 2017-2018: një fushatë sensibilizimi në rrjetet sociale me hashtag #DuamFarmakopeSiGjithëEvropa, e ndjekur nga një kërkesë zyrtare informacioni që studentët e farmacisë të Universitetit të Tiranës i dërguan institucioneve përgjegjëse. Në përgjigjen e Avokatit të Popullit ndaj letrës së studentëve u konfirmua për herë të parë se Ministria e Shëndetësisë kishte nisur procesin e ratifikimit të konventës, në bashkëpunim me Ministrinë e Jashtme.
Anëtarësimi kërkonte miratimin e një ligji të posaçëm në Parlament për ratifikimin e konventës. Ministria e Shëndetësisë e finalizoi me sukses procesin ligjor dhe në shtator 2019 Shqipëria u bë vendi i 39-të që aderon në Konventën për Përpunimin e Farmakopesë Evropiane.
Anëtarësimi krijon mundësi për standarde cilësie dhe sigurie të barnave, duke e afruar Shqipërinë gjithnjë e më shumë me tregun e përbashkët evropian. Ai hap gjithashtu më shumë rrugë rritjeje profesionale për farmacistët shqiptarë dhe për gjithë sektorin farmaceutik të vendit.
